Rezidencat qeveritare të Velipojës dhe Vlorës, dikur ndërtesa të dedikuara për pritjen e personaliteteve të rëndësishme dhe organizimin e ngjarjeve zyrtare, sot përfaqësojnë një pjesë të historisë së mikpritjes shqiptare. Megjithatë, me kalimin e kohës dhe ndryshimin e nevojave, këto prona kanë humbur funksionalitetin e tyre dhe janë kthyer në struktura rrallëherë të shfrytëzuara, duke u bërë një barrë financiare për mirëmbajtje dhe një pasuri e fjetur pa një kthim të prekshëm ekonomik. Në një kohë kur kërkesat për turizëm elitar dhe zhvillim ekonomik po rriten, mbetet thelbësore që këto prona të përqasen me një vizion të ri. Rikonceptimi i tyre nuk është thjesht një opsion, por një domosdoshmëri për t’i kthyer ato në asete të vlefshme dhe dinamike që i përshtaten kërkesave të kohës dhe kontribuojnë në të ardhmen e qëndrueshme të Shqipërisë.
Ky projekt ka si synim të transformojë këto rezidenca nga struktura të amortizuara dhe të pashfrytëzuara në qendra bashkëkohore të turizmit elitar dhe zhvillimit ekonomik. Duke ruajtur vlerat historike të përdorimit të këtyre pronave, rikonceptimi do të sjellë një harmoni mes të shkuarës dhe të ardhmes, duke i dhënë rëndësi jo vetëm inovacionit, por edhe ruajtjes së identitetit të tyre.
Rzidencat qeveritare do të përfshijnë standardet më të larta të mikpritjes bashkëkohore, të mbështetura nga teknologjitë më të avancuara dhe dizajni bashkëkohor. Transformimi i tyre synon të krijojë një përvojë unike për turistët, investitorët dhe personalitetet VIP, duke i kthyer ato në modele të qëndrueshmërisë ekonomike dhe mjedisore.
Transformimi i këtyre pronave do të udhëhiqet nga një vizion i qartë arkitektonik dhe funksional. Projekti synon të integrojë arkitekturën bashkëkohore me teknologjitë e gjelbra dhe inovacionet më të fundit në sektorin e turizmit. Këto ndërtesa nuk do të jenë thjesht struktura për akomodim, por hapësira që reflektojnë një filozofi të re për turizmin elitar, ku luksin dhe elegancën e ndërthur me respektin për mjedisin dhe burimet natyrore. Duke u pozicionuar në destinacione unike, si Velipoja dhe Vlora, rezidencat do të ndërtojnë një lidhje të veçantë me peizazhin e tyre përreth, duke ruajtur dhe vlerësuar bukuritë natyrore që Shqipëria ofron. Në këtë mënyrë, ato do të shërbejnë si pika tërheqëse jo vetëm për turistët ndërkombëtarë, por edhe si modele për zhvillimin e qëndrueshëm të zonave përreth.
Nëpërmjet bashkëpunimit me zinxhirë hotelierë prestigjiozë dhe investitorë, këto prona do të pozicionohen si destinacione turizmi të klasit botëror. Në thelb të këtij vizioni qëndron krijimi i një ekosistemi turistik që promovon zhvillimin ekonomik dhe krijimin e vendeve të reja të punës për komunitetet lokale. Transformimi i rezidencave nuk është vetëm një investim në rentabilizimin e pronave të pashfrytëzuara shtetërore, por edhe në imazhin e Shqipërisë si një destinacion i rëndësishëm turizmi në Mesdhe. Këto struktura do të ofrojnë më shumë sesa luks dhe mikpritje. Ato do të shërbejnë si shembuj të ekselencës në arkitekturë, inovacion dhe qëndrueshmëri.
Kjo nismë përfaqëson më shumë sesa transformimin fizik të disa ndërtesave. Ajo përfaqëson një angazhim për të ardhmen ekonomike dhe sociale të vendit. Duke shfrytëzuar potencialin e rezidencave qeveritare, Shqipëria afirmohet si një lider rajonal në turizmin elitar dhe zhvillimin e qëndrueshëm.
Në fund të këtij transformimi, rezidencat qeveritare të Velipojës dhe Vlorës do të jenë më shumë sesa destinacione për turizmin elitar dhe mikpritjen e personaliteteve të lartë.Ato do të jenë histori suksesi, një model për të tjerët dhe një pasqyrim i aspiratave dhe përkushtimit në vazhdim të Shqipërisë ndaj zhvillimit dhe progresit.
