Agjensia Kombëtare e Planifikimit të Territorit
Search Menu

Lajme

Akademia 100+ Fshatrat: Takim me Kryeministrin në Shishtavec, në kuadër të programit kombëtar “100 Fshatrat”

Në datën 31 Tetor, Agjencia Kombëtare e Planifikimit të Territorit, në kuadër të Programit “100 Fshatrat”, mori pjesë në takimin e zhvilluar në Shishtavec me pjesëmarrjen e Kryeministrit, Koordinatores Kombëtare të Programit “100 Fshatrat”, ministra, drejtues të administratës publike, përfaqësues të komunitetit të zgjedhur në Parlament, etj.

Shishtaveci është pjesë e programit të “100 fshatrave”, ndaj Kryeministri Edi Rama përmes fjalës së tij nxiti projektet për zhvillimin e agroturizmit në këtë zonë.

“Ne do të stimulojmë të gjithë ata që kanë një projekt. Vitin e ardhshëm ne do të vendosim edhe më shumë fonde në drejtim të agroturizmit dhe flas për para që i shkojnë në dorë atyre që duan të merrem me agroturizmin dhe jo për kredi apo borxhe. Kjo është një mënyrë ku shteti kontribuon drejtpërdrejtë duke mbështetur projektin e një familjeje, të një investitori apo emigranti”, – tha Rama.

“Transformimi i Shishtavecit në një destinacion të rëndësishëm turistik për turizmin dimëror do të kthehet shumë shpejt nga një ëndërr në një realitet shumë të prekshëm” – deklaroi Kryeministri Edi Rama, ndërsa prezantoi projektin e dy djemve nga Kukësi, të cilët së bashku me investitorë dhe specialistë sllovenë do të ndërtojnë një resort skish në këtë zonë.

“Rezulton se Shishtaveci ka qenë zonë skish që nga viti 1914-1918, koha e Luftës së Parë Botërore, kur austro-hungarezët zhvillonin gara me ski. Ne jemi shumë të bindur se përfshirja e Shishtavecit në programin e “100 fshatrave” dhe masterplani i Shishtavecit janë një garanci se shumë shpejt do të shikojmë zhvillime të rëndësishme” – shtoi ai në fund.

“Programi “100 Fshatrat” ku bën pjesë edhe Shishtaveci synon të sjellë një model zhvillimi për turizëm në katër stinët e vitit”, theksoi në fjalën e saj Koordinatorja Kombëtare e Programit “100 fshatrat”, znj. Elva Margariti.

“Në rastin e Shishtavecit e veçanta qëndron te fakti, se ky fshat mund t’i kalojë kufijtë e Shqipërisë” – shtoi në fund ajo.

“Natyra, faktori kulturor e social dhe infrastruktura janë tre komponentë që i gjejmë në zonën e Shishtavecit në Kukës”, kështu u shpreh, drejtoresha e Përgjithshme e Agjencisë Kombëtare për Planifikimin e Territorit, znj. Adelina Greca.

“Natyra e Shishtavecit është e ndarë mes tre produkteve që na dhuron natyra, kemi pyje, livadhe edhe tokë bujqësore. Kjo tregon edhe mbështetjen e modelit të zhvillimit, një model i bazuar në turizëm, por edhe në prodhime bujqësore dhe blegtorale, përpunimin e tyre në zonë, si dhe në promovimin e natyrës nëpërmjet zhvillimit të aktiviteteve turistike” – nënvizoi ajo.

Festa e Ullirit dhe Dëgjesa me Komunitetin e Lukovës për Projekt-Idetë e Zhvillimit

Bashkia Himarë, në bashkëpunim me GIZ, organizoi ditën e Shtunë në Lukovë, Olive Fest, të shqipëruar “Festa e Ullirit”.

Festa u shoqërua me disa aktivitete paralele, si konkursi i vjeljes së ullirit, miksimi dhe degustimi i vajit, panairi i produkteve vendase me bazë ulliri, etj. Festa shërbeu për t’u paraqitur banorëve një shembull të suksesshëm të shfrytëzimit të potencialit të fshatit të tyre dhe për të treguar vlerat e produktit të ullirit përtej përdorimit klasik në kuzhinë.

Në festë ishin të pranishëm edhe stafi i AKPT-së që punon për Planin e Detajuar të Lukovës - Atelier Lukova, Grupi i Punës së Akademisë 100+ Fshatrat - lot 21, si edhe Koordinatorja Kombëtare e Programit “100 Fshatrat”, të cilët sollën në festë punën për modelin e zhvillimit të Lukovës.

Dita e Festës së Ullirit, e cila mblodhi rreth vetes vizitorë të shumtë, si edhe shumë banorë të Lukovës, u përdor edhe si platformë për prezantimin e projekt-ideve për zhvillimin e Lukovës dhe për diskutim me pjesëmarrësit.

Në mbyllje, pjesëmarrësit u ftuan për një shëtitje informuese me ndalesa në pikat kyçe dhe më tërheqëse të fshatit, ku grupi i Atelier Lukova pati mundësinë të shpjegonte projekt-idetë e propozuara për to. Secila ide u materializua në banera outdoor, të cilët do të qëndrojnë në hapësirat e Lukovës për disa ditë, për të tërhequr vëmendjen dhe informuar të gjithë banorët e Lukovës.

Olive Fest është një organizim që vjen për herë të parë në Lukovë dhe synon të kthehet në traditë të përvitshme prej banorëve vendas me qëllim ofrimin e një produkti turistik gjithëvjetor.

Akademia 100+ Fshatrat: Workshopi #2 i Adakemisë 100+ Fshatrat

Në datat 23 dhe 25 Tetor, Agjencia Kombëtare e Planifikimit të Territorit, në kuadër të Programit “100 Fshatrat”, organizoi workshopin #2, me pjesëmarrjen e 13 grupeve të punës nga 3 universitete partnere, përfaqësues të institucioneve publike pjesë e Programit 100 Fshatrat, akademikë nga Universiteti Bujqësor i Tiranës, Fakulteti Ekonomik i Universitetit të Tiranës, Universiteti i Durrësit, Dega Marketing, si edhe ekspertë të tjerë të ftuar për të dhënë kontributin e tyre për modelet e zhvillimit të 100+ fshatrave.

Workshopi 2-ditor i Akademisë 100+ Fshatrat vjen në vijim të punës së nisur në muajin Gusht 2018 për hartimin e modeleve të zhvillimit të Fshatrave, në bashkëpunim të ngushtë me stafet akademike dhe studentore të Universitetit Politeknik të Tiranës, Fakulteti i Arkitekturës dhe Urbanistikës, Universiteti Polis, Universiteti Epoka, Universiteti Katolik “Zoja e Këshillit të Mirë”, Universiteti i Tiranës, Fakulteti i Ekonomisë, Universiteti Bujqësor i Tiranës.

Objektivi kryesor i këtij workshopi ishte njohja me draftet e para të modeleve të zhvillimit të fshatrave dhe projekt-propozimet konkrete, dhe po ashtu konsultimi tematik i tyre me të gjithë aktorët pjesëmarrës.

Krahas prezantimeve, të cilat u transmetuan ‘live’ në kanalin Shqipëria2030/AKPT, u zhvilluan edhe tryeza të rrumbullakëta për diskutime sipas temave të veçanta, me kontributin e specialistëve të fushave nga institucionet publike përkatëse dhe universitetet.

Temat kryesore që u diskutuan ishin:

  • Kultura / Etnografia / Historia

  • Natyra / Mjedisi

  • Ekonomia / Turizëmi / Marketingu

  • Bujqësia-Blegtoria / Produktet Lokale / Ushqimi

Workshop #2 për 8 grupet e tjera të Akademisë 100+Fshatrat do të zhvillohet në datën 9 Nëntor, pranë Universitetit Polis, ku grupet e punës së ngritura pranë këtij universiteti do të kenë një proces të ngjashëm prezantimesh dhe diskutimesh.

Planet e Përgjithshme Vendore: Lidhen kontratat dhe nis puna për Planet e Përgjithshme Vendore të 16 Bashkive të fundit

Në datën 15 Tetor, Ministria e Infrastrukturës dhe Energjisë, lidh kontratat me 5 Studio Konsulente për të nisur punën për Planet e Përgjithshme Vendore të 16 Bashkive të fundit:

Has, Fushë-Arrëz, Bulqizë, Peqin, Patos, Roskovec, Mallakastër, Memaliaj, Tepelenë, Selenicë, Libohovë, Finiq, Delvinë, Pustec, Maliq dhe Devoll.

Brenda 6-mujorit të parë të vitit të ardhshëm, i gjithë territori plotësohet me PPV, që do të jenë platforma zhvillimi për 15 vitet e ardhshme për mënyrën sesi do të zhvillohen Njësitë e Qeverisjes Vendore, në zonat rurale dhe urbane.

AKPT do të asistojë teknikisht procesin e hartimit të planeve, si institucioni me përgjegjësi kombëtare në fushën e planifikimit të territorit.

Ky është raundi i katërt i hartimit të planeve vendore, pas reformës administrative territoriale. Punë e mirë është bërë në raundet e mëparshme, por kemi nxjerrë edhe mësime, të cilat do të na udhëheqin për të kryer procese edhe më të mira planifikimi territori.

PËRFSHIRJA E KOMUNITETIT NË ZHVILLIMIN URBAN TË KSAMILIT - NJË QASJE E RE

Në datat 26 dhe 27 Shtator, Agjencia Kombëtare e Planifikimit të Territorit, në bashkëpunim me Superwien, Urban Design Lab, Bashkinë Sarandë, Fondin Shqiptar të Zhvillimit dhe Ministrinë e Infrastrukturës dhe Energjisë u bënë bashkë për jetëzimin e projektit të Bankës Botërore, PIUED, duke organizuar punëtori me grupet e interesit të komuniteti në Ksamil, mbi zhvillimin urban të qëndrueshëm të Ksamilit në të ardhmen.

Gjatë aktiviteteve dy-ditore u diskutuan me pjesëmarrësit ndërhyrjet prioritare sipas komunitetit me fokus përmirësimin e infrastrukturës, shfrytëzimin e potencialit turistik në zgjatjen e sezonit, si dhe mundësive për zhvillimin e ekonomisë lokale me kultivuesit e midhjeve, peshkimit dhe artizanëve të zonës.

Punëtoritë me komunitetin dhe nxënësit e shkollës së mesme rezultuan të frytshme, ku u nxitën mjaft diskutime mes banorëve për përmirësimin e gjendjes ekzistuese të Ksamilit. Në përmbyllje të punëtorive u organizua më datë 27 Shtator, në orën 18:00, prezantimi i hapur në Ksamil, ku banorëve Ju tregua e prezantua idetë e para të frymëzuara nga bashkëbisedimet e zhvilluara me komunitetin e Ksamilit në datat 26-27 shtator.